رباعيات جاهين

مع ان كل الناس من اصل طين
وكلهم بينزلوا مغمضين
بعد الدقايق والشهور والسنين
تلاقى ناس اشرار وناس طيبين


عجبى عليك عجبىعليك يا زمن
يا ابو البدع يا مبكى عينى دوما
ازاى انا اختار لروحى طريق
وانا اللى داخل فى الحياة مرغما


مرغم عليك يا صبح مغضوب يا ليل
لا دخلتها برجليا ولا كانلى ميل
شايلنى شيل دخلت انا فى الحياة
وبكره هخرج منها شايلنى شيل


سنوات وفايتة عليا فوج بعد فوج
واحدة خدتنى ابن والتانية زوج
والتالتة اب خدتنة والرابعة ايه
ايه يعمل اللى بيحدفه موج لموج


وانا فى الضلام من غير شعاع يهتكه
اقف مكانى بخوف ولا اتركه
ولما ييجى النور واشوف الدروب
احتار زيادة واقول ايهم اسلكه


نظرت فى الملكوت كتير وانشغلت
وبكل كلمة ليه وعشان ايه سألت
اسال سؤال الرد يرجع سؤال
واخرج وحيرتى اشد مما دخلت


خرج ابن ادم من العدم قلت ياه
رجع ابن ادم من العدم قلت ياه
تراب بيحيا وحى بيصير تراب
الاصل هو الموت ولا الحياة؟


ضريح رخام فيه السعد اندفن
وحفرة فيها شريد من غير كفن
مريت عليهم قلت يا للعجب
لاتنين ريحتهم فيها نفس العفن


ياما صادفت صحاب وما صاحبتهمش
وكاسات خمور وشراب مشربتهمش
اندم على الفرص اللى اناسبتهم
ولا على الفرص اللى انا مسبتهمش


والكون ده كيف موجود من غير حدود
وفيه عقارب ليه وتعابين و دود
عالم مجرب فات وقال سلامات
ده ياما فيه سؤالات من غير ردود.


وعجبى!!


لو فيه سلام فى الارض وطمان و أمن
لو مفـيش ولا فقـر ولا خـــــوف و جبن
لو يملـك الانسـان مصيـر كــــل شيـــئ
اـنا كـنت اجيـب للدنيـا مِيـت ألــف إبــن


يوم قلت اه ... سمعوني قالوا فسد
ده كان جدع قلبه حديد و اتحسد
رديت على اللايمين انا و قلت اه
لو تعرفوا معنى زئير الأسد......عجبي!!


ولدي نصحتك لما صوتي اندبح
ما تخافش من جني ولا من شبح
و ان هب فيك عفريت قتيل اسأله
ما دافعش عن نفسه ليه لما اندبح؟


ليه يا حبيبتي ما بينا دايما سفر
ده البعد ذنب كبير لا يغتفر
ليه يا حبيبتي ما بينا دايما بحور
اعدي بحر الاقي غيره اتحفر


ورا كل شباك الف عين مفتوحين
و انا و انتي ماشيين يا غرامي الحزين
لو التصقنا نموت بضربة حجر
ولو افترقنا نموت متحسرين


انسان ايا انسان ما اجهلك
ما اتفهك في الكون و ما اضالك
شمس و قمر و سدوم و ملايين نجوم
و فاكرها يا موهوم مخلوقة لي


انا الذي عمري اشتياق في اشتياق
وقطر داخل في محطة فراق
قصدت نبع السم و شربت سم
من كتر شوقي و عشمي في الترياق


غمست سنك في السواد يا قلم
علشان ما تكتب شعر يقطر ألم
مالك جرالك ايه يا مجنون..و ليه
رسمت وردة و بيت و قلم و علم


مرحب ربيع مرحب ربيع مرحبة
ياطفل ياللي في دمي ناغى و حبا
علشان عيونك يا صغنن هويت
حتى ديدان الارض و الاغربة


جــالك اوان و عرفت مشى الجنايــز
كيف شـُـفتها يا عبد رب اللذايـــــــذ
قــال : شفت شيل بالحيل فقير أو أمير
كما شالوا فى الخمامير فواضــى القـزايـز


يا اللى انت فى بيتك قش مفروش بريش
تـــقوى عليـــة الريح . يصبـــح مفبيــش
عجبــى عليــك حـواليــك مخــــالب كبـــار
وما لكــش غيــر منقــار وقــادر تـعيــــش


أيــوب رمــاه البيــن بــكل الـعـِـلل
سبع سنين مـرضـان وعنـده شلل
الـصبر طيب . . صبر ايوب شفاه
بس الأكادة مــات بـفـعـل . المــلل


يا حزيـن يـا قــمقـم تحـت بحـر الضيــاع
حــــزين أنــــا زيـك وإيـــه مســــتـــطاع
الحـزن مـا بقالهــوش جــلال يا جــــــدع
الحـــزن زى البـــرد .. .. زى الصــداع


يا اللى عرفت الحب يوم و انطوى
حسك تقول مشتاق لنبع الهوى
حسك تقول مشتاق لنبع الغرام
دا الحب من داق منه قطره ارتوى


مرغم عليك يا صبح مغصوب يا ليل
لا دخلتها برجليا و لا كان لي ميل
شايليني شيل دخلت انا في الحياه
و بكره حاخرج منها شايلييني شيل


انا اللي بالامر المحال اغتوي
شفت القمر بصيت لفوق في الهوه
طلته ماطلتوش ايه انا يهمني
و ليه مادام بالنشوى قلبي ارتوي


الفيلسوف قاعد يفكر سيبوه
لا تعملوه سلطان و لا تصلبوه
ما تعرفوش إن الفلاسفه يا هوه
اللي يقولوه بيرجعوا يكدبوه


علي بعد مليون ميل من أرضنا
من الفراغ الكوني بصيت أنا
لا شفت فرق بين جبال و بحور
و لا شفت فرق ما بين عذاب أو هنا


إنسان أيا إنسان ما أجهلك
ما أتفهك في الكون و ما أضألك
شمس وقمر و سدوم و ملايين نجوم
و فاكرها يا موهوم مخلوقه لك


نظرت فوق للنجوم و انا ساير
رجليا عترت في الحفر و الحجاير
بقيت أقول و انا ع التراب: يا سلام
مش بس عبره أخذت لكن عباير


- يا نجم .. نورك ليه كده بيرتجف ؟
هو انت قنديل زيت ؟ أو تختلف
- أنا نجم عالي .. بس عالي قوي
و كل ما انظر تحت اخاف انحدف


السم لو كان في الدوا منين يضر ؟
و الموت لو عدونا .. منين يسر؟
حط القلم في الحبر و اكتب كمان
و العبد للشهوات .. منين هو حر؟

عجبي !!!



كروان جريح مضروب شعاع م القمر
سقط من السموات فؤاده انكســـــــــر
جريت عليه قطه علشان تبلعـــــــــــه
أتاريه خيال شعراء و مالهـــــوش أثر

عجبي !!!


ياللي نصحت الناس بشــــــــــــــرب النبيت
مع بنت حلوه .. وعود , وضحك , وحديت
مش كنت تنصحهم منين يكســــــــــــــــبوا
تمن ده كله ؟ ... و الا يمكن نســـــــــــيت

عجبي !!


ما حد في الدنيا واخد جزاتــــــــــــــــــه
و لا حــــــــــــــــد بيفكر في غير لذاذاته
ما تعرفيش يا حبيبتي .. أنا و انتي مين؟
إنتي عروس النيل ... و أنا النيل بذاته

عجبي !!


رقاصه خرسا و رقصه من غير نغــم
دنيا . . يا مين يصالحها قبل النـــــدم
ساعتين تهز بوجههـــــــــــــــا يعنـي
يترجرجوا نهديها يعني نعـــــــــــــــم

عجبي !!!


إخطفني ياللي تحبني ع الحصان
الدنيا قالت يوم في ماضي الزمان
إخطفني ياللي تحبني ع الـــــفرس
الدنيا قالت .. قام خطفها الشيطان

و عجبي